അന്ധനാര്?

അന്ധനാണോയെന്നെന്നോടു
ചോദിച്ചവരോടെല്ലാം
രോഷത്തോടെ ഞാൻ പറഞ്ഞു
അന്ധൻ ഞാനല്ല, താനാണെന്ന്.

മനസിൽ അടിയുറച്ച
ചില വിശ്വാസ ധാരണാ മനോഭാവങ്ങൾ
കൺപോളകൾപോലെ
യാഥാർത്ഥ്യങ്ങളെ
കണ്ണിൽ നിന്നും മറച്ചു
എന്നറിഞ്ഞപ്പോൾ
സമ്മതിക്കേണ്ടിവന്നു
ഞാൻ ഒരു പാതി അന്ധനാണെന്ന്.

ആ വിശ്വാസ ധാരണാ മനോഭാവങ്ങൾ
കടത്തിവിട്ട നിറംമാറിയ
രശ്മികളാണെന്നിൽ സത്യത്തിനു ചേരാത്ത
ഇഷ്ടരൂപങ്ങളെ
യാഥാർത്ഥ്യമെന്നോണം വരച്ചതെന്നറിഞ്ഞപ്പോൾ
തിരിച്ചറിഞ്ഞു
ഞാനൊരു മുഴു
അന്ധനാണെന്ന്.

ആ തിരിച്ചറിവ് എനിക്കു
കാഴ്ചയുടെ ഔഷധമായി.

എന്നേയും എല്ലാവരേയും
സംബന്ധിച്ച വിശ്വാസ ധാരണാ മനോഭാവങ്ങളെ
ഞാൻ ഒരു റിയാലിറ്റി ടെസ്റ്റിനു
വിധേയമാക്കി.

അപ്പോൾ ഞാനറിഞ്ഞു
സത്യമെന്നു കരുതി നിധിപോലെ സൂക്ഷിച്ച പലതും
എൻറെ മനസ്സു വരച്ച
വെറും ചിത്രങ്ങൾ
മാത്രമായിരുന്നുവെന്ന്.

സത്യം എൻറെ
ഭാഗത്തായിരിക്കണമെന്നതല്ല
ഞാൻ സത്യത്തിൻറെ
ഭാഗത്തായിരിക്കണം എന്നതാണ്
നേരായ ജ്ഞാനം എന്ന
ചിന്താ ശലഭം
ബോധമനസിൽ നിന്നും
അഗാധ മനസിലേക്കു
പറന്നിറങ്ങി.

അവിടെ ഞാൻ തുടങ്ങി
യാഥാർത്ഥ്യങ്ങൾ തേടിയുള്ള തീർത്ഥാടനം.
മനസിൻറെ തീർത്ഥാടനം.