മാതാ പിതാ ഗുരു അറിയാൻ...

         ഈ അദ്ധ്യയന വർഷത്തിൽ മാതാ പിതാ ഗുരു സുമനഃസുകളോട് അനുദിനം കുട്ടികളുടെ പ്രശ്നങ്ങൾ കേൾക്കുന്ന ഒരു മനഃശാസ്ത്രജ്ഞൻ എന്ന നിലയിൽ പ്രധാനപ്പെട്ട ഏഴു കാര്യങ്ങൾ സ്നേഹപൂർവ്വം ഓർമ്മിപ്പിക്കുവാൻ ഞാൻ ആഗ്രഹിക്കുന്നു:

1, സ്വഭാവ ദോഷങ്ങൾ മാറ്റുവാനല്ല മറിച്ച് അവയ്ക്കെതിരായ സ്വഭാവ ഗുണങ്ങൾ കൃത്യമായ ആസൂത്രണത്തോടെ വളർത്തുവാനാണ് പരിശ്രമിക്കേണ്ടത്. നല്ലതു വരുമ്പോൾ അതിനെതിരായതു തനിയേ മാറിക്കൊള്ളും. ദോഷങ്ങൾ തിരിച്ചറിയുന്നത് ഗുണഗണങ്ങൾ വളർത്താനുള്ള ലക്ഷ്യത്തിനുവേണ്ടി മാത്രം എന്നുറപ്പിക്കണം. എന്തു ചെയ്യരുത് എന്നതിനേക്കാൾ എന്തു ചെയ്യണം, എങ്ങനെ ചെയ്യണം എന്നതിൻറെ വ്യക്തായ രൂപരേഖ കുട്ടികളുടെ മനസ്സിൽ പതിപ്പിക്കാനാണ് നാം ശ്രദ്ധിക്കേണ്ടത്.

2) നിങ്ങളുടെ കുട്ടിയെ വ്യക്തിപരമായി മനഃസിലാക്കാൻ മറ്റൊരു കാര്യത്തിലും വ്യാപൃതമാകാത്ത കുറച്ചു സമയം (മൊബൈൽ പോലും എടുക്കരുത്) അവരോടൊപ്പം ചിലവഴിക്കണം. ഈ വിലപ്പെട്ട സമയം ഒന്നും ഉപദേശിക്കാതെ അങ്ങോട്ടധികം പറയാതെ മുൻവിധിയില്ലാതെ കുട്ടി പറയുന്നതു മുഴുവൻ സ്നേഹത്തോടെ കേട്ടിരിക്കാം. അവരുടെ കുറുമ്പും കൂട്ടും കളികളും സംശയങ്ങളും ആശങ്കകളും ക്ഷമയോടെ ഈ സമയത്തു കേട്ടിരിക്കാം. തങ്ങളെ മനസിലാക്കുന്നവർക്കു മാത്രമേ കുട്ടികളുടെയുള്ളിൽ സ്ഥാനവും സ്വാധീനവുമുള്ളൂ എന്ന വസ്തുത നാം മറക്കരുത്.

3) അക്കാദമിക് പെർഫോമൻസ് എന്നതിനേക്കാൾ പഠനത്തിനായുള്ള അവരുടെ പരിശ്രമത്തിലേക്കാണ് നമ്മൾ ശ്രദ്ധിക്കേണ്ടത്. പഠിക്കുന്ന രീതി, ചിട്ടയായ പഠന ക്രമം, പഠിക്കുന്ന വിഷയത്തോടുള്ള താത്പര്യം, ഏകാഗ്രത, പഠനത്തോടും അദ്ധ്യാപകരോടും വിദ്യാലയത്തോടുമുള്ള മനോഭാവം എന്നിങ്ങനെ പല ഘടകങ്ങളും ഈ പരിശ്രമത്തിൽ അടങ്ങിയിട്ടുണ്ട്. അവിടെയാണ് തിരുത്തലുകൾ വരുത്തേണ്ടത്. മാർക്കും ഗ്രേഡും അടിസ്ഥാനമാക്കിയ പെർഫോമൻസ് എന്ന പ്രതിഭാസം പരിശ്രമത്തിൻറെ ഒരു സ്വാഭാവിക ഫലം മാത്രമാണ്.

4, ശിക്ഷയുടെ കാഠിന്യമല്ല മറിച്ച് ശിക്ഷയുടെ ഉദ്ദേശ്യം സംബന്ധിച്ച തിരിച്ചറിവാണ് ഒരു കുട്ടിയെ ദുഃസ്വഭാവങ്ങളിൽ നിന്നും പിന്തിരിപ്പിക്കുന്നത്. അതുകൊണ്ട് ആക്രോശം, വടി, അടി, വഴക്ക് മുതലായ ധാർമ്മികരോഷ പ്രകടനങ്ങളും ദേഷ്യ ശമന മാർഗ്ഗങ്ങളും മാറ്റിവച്ച് തിരിച്ചറിവു നൽകുന്ന ഫലപ്രദമായ മറ്റു ക്രിയാത്മക മാർഗ്ഗങ്ങൾ ശിക്ഷണത്തിനായി നാം സ്വീകരിക്കണം. അഡോൾഫ് ഹിറ്റ്ലറും കഠിനമായ ശാരീരിക ശിക്ഷ ലഭിച്ചു വളർന്നയാളായിരുന്നു. അതൊന്നും അയാളിൽ തിരിച്ചറിവുണ്ടാക്കിയില്ല എന്നതാണ് സത്യം.

5, ഈ അദ്ധ്യയന വർഷത്തിൽ നിങ്ങളുടെ കുട്ടിയുടെ മൊബൈൽ സോഷ്യൽ മീഡിയ ഉപയോഗം 0% എന്ന് നിങ്ങൾ ഉറപ്പാക്കുക. കുട്ടികളുടെ പല മാനസിക പ്രശ്നങ്ങൾക്കും സ്വഭാവ വ്യതിയാനങ്ങൾക്കും താത്പര്യക്കുറവ് ഏകാഗ്രതക്കുറവ് മുതലായ പഠന പ്രശ്നങ്ങൾക്കും കാരണം മാതാപിതാക്കളുടെ മൊബൈൽ അറിഞ്ഞോ അറിയാതെയോ കുട്ടികൾ സ്വകാര്യമായി ഉപയോഗിച്ച് സോഷ്യൽ മീഡിയയിലും അശ്ലീല സൈറ്റുകളിലും സജീവമാകുന്നതുകൊണ്ടാണ്. പക്വതയോടെ കൈകാര്യം ചെയ്യാനാകുന്ന കാലഘട്ടത്തിൽ മാത്രം അവർ മൊബൈൽ ഉപയോഗിക്കട്ടെ. അതുവരെ ക്ഷമയോടെ കാത്തിരിക്കാൻ പരിശീലിപ്പിക്കാം.

6, സൗഹാർദ്ദപരമായ അടുപ്പം ആഗ്രഹിക്കുന്ന ന്യൂ ജെനറേഷൻ കുട്ടിയെ മനസ്സിലാക്കി പെരുമാറുക. മാതാ പിതാക്കളോടും അദ്ധ്യാപകരോടും ഭയത്തോടും വിറയലോടും ആദരവു കാണിക്കുന്ന, പേടിക്കുന്ന പരമ്പരാഗത ശൈലിയല്ല ഇന്നത്തെ പുതുതലമുറയ്ക്ക്. അതിലൊന്നും കാര്യമായ അർത്ഥം തോന്നാത്തതിനാൽ വാത്സല്യവും അടുപ്പവും ഫ്രീ ടോൽക്കും ആഗ്രഹിക്കുന്ന ന്യൂജെനറേഷൻ 'ബ്രോ', 'മച്ചു', 'ഡ്യൂഡ്' ഒക്കെയാണ് നമ്മുടെ കുഞ്ഞുങ്ങൾ. ഗൗരവം വെടിഞ്ഞ് ലാളിത്യവും സ്നേഹവും വാത്സല്യവും നിറഞ്ഞൊഴുകുന്ന ഒറിജിനൽ സമീപനമാണ് നാം അവരോട് പുലർത്തേണ്ടത്. നമ്മുടെ വാക്കുകൾ സ്വീകരിക്കാൻ അവരെ തോന്നിക്കുന്നത് അവർക്കുമേൽ നമുക്കുള്ള അധികാരമല്ല മറിച്ച് നമുക്ക് അവരിലുള്ള സ്നേഹ സ്വാധീനമാണ്. എന്തു കാര്യത്തിലും നമ്മോട് ഉള്ളുതുറക്കാൻ ആ കുരുന്നു ഹൃദയം ഭയപ്പെടാതിരിക്കട്ടെ. അതിനു അവരിലൊരാളായി നമുക്കു മാറാം.

7, എന്തിനും ഏതിനും പുറകേ നടന്ന് ഉപദേശിക്കുന്ന പഴഞ്ചൻ പരിപാടി ഇനിയെങ്കിലും നിർത്താം. സാഹചര്യത്തിനനുസരിച്ച് ശരിയായ വിലയിരുത്തലിൻറെ അടിസ്ഥാനത്തിൽ നിങ്ങളുടെ ബോധ്യങ്ങൾ പങ്കുവയ്ക്കുകയും തിരുത്തലുകൾ വരും വരായ്കകളുടെ വെളിച്ചത്തിൽ ബുദ്ധിപരമായി അവരോട് അവതരിപ്പിക്കുകയും ചെയ്യുക. ഉപദേശങ്ങളുടെ അളവല്ല വസ്തുതകളുടെ ബോധ്യപ്പെടലാണ് കുട്ടികളിലെ മാറ്റത്തിനു പിന്നിൽ.നല്ല മാറ്റങ്ങൾ അത് എത്ര ചെറുതാണെങ്കിലും പ്രോത്സാഹിപ്പിക്കാൻ മറക്കരുത്.

ഈ ഹൈടെക്ക് കാലഘട്ടത്തിൽ നമ്മുടെ ന്യൂജെനറേഷൻകാരെ പരിപാലിക്കാൻ ഹൈടെക്ക് മാർഗ്ഗങ്ങളുള്ള ന്യൂജെനറേഷൻ പേരൻറീംഗ് ആണ് ആവശ്യം. അതല്ലെങ്കിൽ കാര്യങ്ങൾ നമ്മുടെ കൺട്രോളിൽ നിൽക്കില്ലാട്ടോ...

സ്നേഹപൂർവ്വം:
Rixon Jose
Consulting Psychologist
Sunrise Institute of Mental Health and Research (SIMHAR)
Kochi
9447728147